بسمه تعالى
--------

المستهل
-----

ابحرگه يالهادي صحت -- بويه بويه

عني مو وكتك رحت -- بويه بويه

صعب فرگاك -- اخذني اوياك

---------

آنه البضعه العزيزه من تناديها

يبويه البت صعب فگد الأبو اعليها

خيمه الها وجوده وتحتمي بيها

ولو راح الأبو المن يخليها

صرخه بالكون اسمعت -- بويه بويه

لأمتك چن ودعت -- بويه بويه

اغمضت عيناك -- اخذني اوياك

-------------------

الك أم آنه بويه من تناديني

وياذيك الذي يابويه ياذيني

مافد يوم بوجودك بچت عيني

اشلون اليوم ترحل بويه حاچيني

لاحزن مره اعرفت -- بويه بويه

هظم مالحظه شفت -- بويه بويه

مگدر انساك -- اخذني اوياك

------------

يبويه اجفاك كلفه اعلى الحسن وحسين

اولادك تحبهم عندك ارياحين

باحضانك تربوا يالعزيز اسنين

ماترضه لون َ واحد بچتله العين

عگبك اعليهم خفت -- بويه بويه

صعب هالموقف شفت -- بويه بويه

خيمه ردناك -- اخذني اوياك

-----------------

يبويه والدهر خطره مراميه

اخاف ابروحتك يتجاسر اعليه

هم وصيت بويه امتك بيه

لوحگي ينكروه تدري تاليه

حگي مني ينسلب -- بويه بويه

انحرم عيش العذب -- بويه بويه

چنت بحماك -- اخذني اوياك

----------------

صدگ شافت هظم عگب النبي وآلام

أمه ابلا شرع وتحرَف الاحكام

عالطاغوت ردت تعبد الاصنام

للزهره ضلعها كسرته الظلام

تصرخ ابدار الحزن -- بويه بويه

ضلع مكسور وتون -- بويه بويه

ولوني اعداك -- اخذني اوياك

--------------------

يبويه والبواچي اتوالف اعيوني

أون وانحب اريدن مايخلوني

حتى امن البواچي اعليك منعوني

وحگي ينغصب من حگي حرموني

ادموع واهموم ومحن -- بويه بويه

اجفوني تدري اتجرحن -- بويه بويه

دمعي ناداك -- اخذني اوياك

-------



سيد عدنان الحمامي