ام البنين -- اليوم ام البنين اتكول -- وينه اللي يواسيني
 

بسمه تعالى


لام البنين ع
المستهل


اليوم ام البنين اتگول -- وينه اللي يواسيني
فگد الاربعه وحسين -- هوه اللي عمه عيني



وينه اللي يواسيني -- ويشارك دمعتي هاي

آنه الفاگده الشبان -- آنه دم بچت عيناي

آنه ام البنين الناس -- كلها بالحزن وياي

عندي امن الشباب اسباع

من عدهم تروط الگاع

بيهم هالتعب ماضاع

نعمين وكفوا منهم -- واحدهم يجازيني
-------------------


جازوني وفه الطيبين -- ردوا بالوفه اتعابي

لاچن بالدليل اصواب -- بفگدهم خزّن اصوابي

واليوم ابمنيتي اليوم -- اموجهه الهم اعتابي

ماظن ولدي ينسوني

بمنيتي خل يحضروني

ليهم شابحه اعيوني

بلچن واحد اليلله -- يم راسي ويحاچيني


--------------
مرتّ بيّه هالساعات -- وآنه امنازع اويه الموت

ولدي الاربعه ايحضرون -- اوياهم جابوا التابوت
واذا ماحضروا الليله -- اظل امشوبحه وماموت

اريدن يمي هالساعه

الگمر يحظني بذراعه

واغمض عيني بوداعه

ينگطلي اريد الماي -- گبل الموت يرويني



بشفافي ينگط الماي -- ردت عباس نور العين

لو شمعة حياتي الچان -- هيبتهم عزيزي حسين

وين الطارش اليوصل -- يخبرهم بحالي وين

أمهم وآنه مشتاگه

وگلبي تنزف اشواگه

بلچي اوياهم اتلاگه

وعيني تغمض امن اتشوف -- ولدي من يداروني



اذا ماحضروا بهل الحين --- ايدي من يسبلها

وياهو دمعة اعيونه -- اعليه من يجي ايهلها

ليش ام البنين الناس -- اتكول او لاولي الها

وآنه اربعه ولدي

اموت او لاولد عندي

الموتي سبلت يدي

اودع دنية الاحزان -- ولدي من يودعوني



أيست ما اجوا ليها -- الحره وماتت بهمها

لايمها حضر عباس -- واخوته ما اجوا يمها

غمضت عينها والروح -- الباريها تسلمها

راحت بالحزن والهم

بدموع الجرت من دم

وجرح البيها مايلتم

گالت ولدي هذا اليوم -- همه اللي يشيعوني


سيد عدنان الحمامي

عطر الله انفاسك سيدنا

الجليل قصيدة رائعة جعلها الله في ميزان حسناتك

جمييييييييييييييييييييييل جدا جدا جدا عاشت ايدك كلمات ولااروع في

حق أم البنين روحي ليها الفداء

رزقنا الله واياكم زيارتها وشفاعتها

آآآآآمين رب العالمييين