:: منتديات السيد عدنان الحمامي ::

بسمه تعالى

-------- الوزن بحر الطويل

عليل وشفت بعيوني -- لاشافت عساها العين

ابويه اعله الرمح راسه -- وعمي امگطعه الچفين

----------------

عليل ابلوعتي وهظمي -- ونار النايبه بحشاي

اتوچه اعله حسراتي -- وظيم الشافته عيناي

ابويه بس نحر شفته -- وراسه للشماته اوياي

وصدره الشمته الزهره

تسحگه الخيل وتكسره

ورضيعه المنگطع نحره

نيمته على صدره -- ومن نحره سمعت اونين

------------------------

سمعت الصوت من نحره -- يگلي ياعلي اوليدي

على صدري الطفل خليه -- وفوگ الطفل حط ايدي

صحت ياهظمة الهظمه -- يونه بالگلب زيدي

ابويه من شلت ايده

اخليها على اوليده

رضيعه السهم بوريده

اصبع شاهدت مگطوع -- من چفه لبويه حسين

---------------------------
لون مانظرت اعيوني -- ولاصوب الشريعه امشيت

اتعثر ابعلتي شلون -- ظهري اعله الچفيل احنيت

بس ازنود لاچفين -- وعينه لاشفت ياريت

شوفه بالسهم طافيه

وجوده الماي ماظل بيه

والرايه حزينه اعليه

يم راسه اگعدت وبچيت -- منوانه يعمي وين

-----------------------

منوه هالحرم لاوين -- الوحده يم وليها اتنوح

ليله يم علي الاكبر -- تون اگبالها مذبوح

ورمله اشحالها رمله -- بس الجسد مابيه روح

تنعه گاعده يمه

يعمي اتحنت بدمه

يعريس الفجع امه

ويبني الماتهنه اتصيح -- من عندي يخطفه البين

------------------------

يبره ياجرح بيه -- عليل امرمر ابعلتي

مچتوف ابحبل مچتوف -- ابرگبتي وچتفوا عمتي

يسير اعله الهزل للشام -- لحظه ما خفت ونتي

روس اعله الرماح اتلوح

اصد ليها ابگلب مجروح

يعمي اتريد مني الروح

اتفيض امن الهظم والضيم -- ولا واحد الحالي ايعين

-----------------------

والاصعب واشد بالشام -- بينه أتشمتوا بينه

طلعت ناسهم چن عيد -- خوارج صاحت اعلينه

زادت حسرتي وناديت -- لون جدي حضر لينه

رسول الله ويناشدهم

ياسايه وذنب عدهم

وآنه المصطفى جدهم

چاينظر الراس حسين -- ابسن ارماحها امعلگين

--------------------

ابسن الرمح راس حسين -- اشوفه امعلگ اگبالي

چنه يصد بعيونه -- عزيز الزهره يبرالي

يدريني عليل ابجور -- مضيوم وسگم حالي

عليل ومبتلي بعيال

حملت الماتحمله اجبال

والله امن الهظم تنزال

عمامي واخوتي كلهم -- وابويه وصحبته امذبحين

--------------------------

سيد عدنان الحمامي