أشهد أن علياً وليُّ الله
يالـگـضيت ابطبرتك
هذا احـنا شيعـتك
نبـچـي المصابك
ساعة اغيابك
** ** ** **
مـنْ سمـعـنا ابهالمسـيه
قالــوا اتــوذّر عـلي
انمزجت ادمـوع النهلـها
ويْ دمومـه اللي اتْهــلي
انفـگـد من عدنا وسفـه
آه مـن فـگـد الولـي
و احنا نصرخ بالملامــه
او مـنا صـرخـه تعـتلي
يا عـلي وابهالدمـع
كل قلب ظل منصدع
يفجع اصوابك
ساعة اغيابك
** ** **
إنتـه يا حـيدر أملـنا
اشلـون تقضـي ابهالمسـا
وانتـه للمؤمـن وسـيله
وبالشـدايـد تحــرسـه
ولمـن اسمعـنا ابمصـابك
طفحـت ادمـوع الأسى
والـگـلب بسمك تلاهب
لـو تجـيْ تتـحسـسه
كل قلب بيه الحزن
ويه جسمك يندفن
نغفى بترابك
ساعة اغيابك
** ** **
لو حسـن واحسين ناحوا
عـالجسـد يالـمرتـضى
وناحـت اويـاهم ملايك
سـيدي ابكل الفـضـا
هـم إلك هالشيعه ناحت
واشتعــل بيها الغضـا
واحنا من حبك يحــيدر
(ننعـرف بالـرافـضــه)
مـا نعوفـك للأبــد
ســيدي رغم الشـدد
نبقى اصحابك
ساعة اغيابك
** ** **
و زينب النصـبتْ عـزيّه
ابموتك الهـدّ الـگـلب
همْ مثلها اجفـون عـدنا
تنـثر ادمـوع واتصـب
فرگـتك غصـبن عليـنه
سـيدي و اللّـه غصـب
لو نشوف اخضـاب نذكر
راسـك الظـل منخضـب
اخلافك الوادمبـگـت
تذكر ادمـوم الجرت
والدما اخضابك
ساعة اغيابك
** ** **
نلهـج ابإسمـك يحـيدر
والإسـم خالـد صـبح
كل حـرف سجـل ملاحم
والنصـر بـابـه انفـتح
فضلـك اتسامـه ابعلـوك
والفضـل إلـنا اتـضـح
نحـيا وانموت اعلى حـبك
حـتى لو دمـنا انسفـح
بسمك الحُـرْ لن هتف
يلْ ربيت على الشرف
يبـچـي محرابك
ساعة اغيابك
** ** **
بالأذان انصـيح و اللـه
انــته يحـيدر ولـي
ويّه إسـم اللـه ونبـّيه
ينذكر اسمك عــــلي
إنتـه زيـنه للمـآذن
يـا فـرج كـل مبـتلي
لو يريدوا يخفـوا اسمـك
خالـد و مــا تنجـلي
والإسـم مـن ينذكر
تخمد اصـوات الكفر
والعدا اتهابك
ساعة اغيابك
** ** **
چـم صلاة اللي كتـبها
ربـنا و اعليـنه فـرَض
هيَّ خمْـس و من نصــلي
يكتمـل بـيك الفـرض
نستمــع اسمك يدوِّي
وبرغـم عَـلِّيْ اعـترض
لاچـن افراقك يحـيدر
ما خلَـفْ إلـنا العـوَض
ابكل فريضه يالولي
نذكر امصابك علي
تبجي احبابك
ساعة اغيابك
** ** **
لو يـگـولون العـواذل
إنـته مـيِّت مـنـدفـن
نهـتف انـگـللهم انته
بيـك كل حُـرْ منفــتن
عايـش ابكل الضـماير
مثل مـا عــاش الحـزن
هذا حـال الشيعه بعـدك
بالأسى الكـل مـمتحـن
هذا احنا ابكل وكت
والدمع بسمك يكت
هالعدو صابك
ساعة اغيابك
** ** **