شفتي بالطف قصص..من الغاضريه
 

شفتي بالطف قصص..من الغاضريه
لوعه وهموم وهظم..مثل الزجيه
مدري افكر بالضعن مدري أعله اسري
اتحزمي حزام المنيه وشلي صبري
هم تجيني
&&&
خويه حرك اخيامك بعيني شفتها
اطفالك البلطف يخويه من شلتها
بيدي من النار ياخويه انقذتها
جلمه منك خويه انه اتذكرتها
لو بقيتي وحدج وياج المصايب
اتحملي ياخويه اشكثر هم وانوايب
بالي يمج خويه ومنشده فكري
اتحزمي حزام المنيه وشلي صبري.. هم تجيني
&&&
شفت ياخويه عيالك كلها تنشد
وين ابو فاضل يجينه يمته ايرد
عمي يازينب علينه ليش يبعد
كلوبنه من الخوف عمه هيه ترعد
انريده ياعمه يجينه يطمن علينه
احنه ايتامه نريده احنه ولينه
حرت ياخويه شجاوب شنهو عذري
اتحزمي حزام المنيه وشلي صبري.. هم تجيني
&&&
دمعت حركه وشجن خويه عيوني
اطفالك بلهفه يخويه عنك ناشدوني
تحيرت خويه بسؤالي بكل ضنوني
هامت عليك وتنادي كلها شجوني
وينه حماي الضعينه البيه حميه
خل يجيني اليوم عمه بهالمسيه
اليوم ياخويه الهظم نيرانه تسري
اتحزمي حزام المنيه وشلي صبري.. هم تجيني
&&&
خويه حرت ابين امرك وبعيالي
كلت هسه الموت وياكم حلالي
راح كل زهوت حياتي وكل دلالي
استمع صوتي الينادي وهم سؤالي
لون امسه اليوم وعيوني عليكم
تنتظر خويه النسه تسمع حجيكم
ناري تسعر بالكلب وانت تدري
اتحزمي حزام المنيه وشلي صبري.. هم تجيني
&&&
امودع بالله يخويه يبو فاضل
رحت انت للقتال وبيهم تقاتل
اتركتني بوحدي اعيلهن العوايل
شلت ضيم الكفر كلها بالمحامل
شلت ياخويه الهظم هم ومصيبه
اني ام الصبر الهم مو عجيبه
حافظت خويه الامانه وصنت خري
اتحزمي حزام المنيه وشلي صبري.. هم تجيني
&&&
خادم اهل البيت
ابو علي السعيدي