ليلة العاشر -- خل اشمك -- خويه خويه
 

المستهل
... ....

خل أشمك ... خويه خويه
وصت أمك ... خويه خويه
الزهره وصتني وصيه ... شمي اخوچ حسين اليه
خويه خويه
....
ياالاهي لو دعه المظطر تجيب
هذا ليل أوداع شو چنه رهيب
وصار الموادع حبيب أويه الحبيب
وين اظمك خويه يحسين الغريب
عندي غالي ... خويه خويه
أي يوالي ... خويه خويه
گالت بليل المنيه ... شمي أخوچ حسين اليه
خويه خويه
....
عيني بس تربي لخوتي وشابحه
جفوني من سهر السهرته امجرحه
باچر بصبح المنايا أمصبحه
وخاف أشوف الجثث بالدم سابحه
وحشه ليلي .. خويه خويه
هدم حيلي .. خويه خويه
بسمعي چن صوت الزجيه ... شمي أخوچ حسين اليه
خويه خويه
....
صوت أسمعه وآنه افتر عالخيم
وحده للاخره اسمعت من الحرم
شلون لو عسكر المايرحم هجم
شلون لو كافل ضعنه ماسلم
بچت عيني ... خويه خويه
أشتد ونيني .. خويه خويه
آكدت أمي عليه ... شمي اخوچ حسين اليه
خويه خويه
.....
شرد أودع چم شباب وچم فته
القاسم أوّحّيد لأمه وحظنته
بسيف أبوه الحسن گامت حزمته
وشمة اوداع المسيه شمته
صبح باچر ... خويه خويه
دم مناحر ... خويه خويه
وآنه بس هذا البديه .... شمي أخوچ حسين اليه
خويه خويه
.........
أم الاكبر من اصدن ليها
أخذ روحي أتگله لتخليها
بعد عينك روحي شلي بيها
هذي آخر ليله التباريها
وآنه أكابر .. خويه خويه
وگلبي حاير ,,, خويه خويه
أمن الأخو أيودع اخيه ... شمي اخوچ حسين اليه
خويه خويه
.......
هاي آخر ليله مريود الصبر
وي كفيلي وعيني بعيون البدر
گلي يازينب الچ أفدي العمر
وأدري وياه باچر الحد الظهر
وما أشوفه ... خويه خويه
بس چفوفه ... خويه خويه
بذاكه ليل الغاظريه ... شمي أخوچ حسين اليه
خويه خويه
...
سيد عدنان الحمامي