:: منتديات السيد عدنان الحمامي ::

:: منتديات السيد عدنان الحمامي :: (http://www.adnanalhamame.com/vb/index.php)
-   قصائد القاسم وعلي الاكبر ع (http://www.adnanalhamame.com/vb/forumdisplay.php?f=63)
-   -   للقاسم ع تفارگني ماعندي صبر -- يبني يغالي (http://www.adnanalhamame.com/vb/showthread.php?t=11753)

سيد عدنان الحمامي 06-26-2019 11:26 AM

للقاسم ع تفارگني ماعندي صبر -- يبني يغالي
 
المستهل
...
تفارگني ماعندي صبر ... يبني يغالي
يالخذت من عمري عمر ... يبني يغالي
جاسم غيابك طال ... عفت أمك بياحال
يبني يغالي
.....
يشمعة بيتي ياثمرة أسنيني
الك حن الگلب وشتد حنيني
تعال بطيف يبني لو تجيني
أشوفك أرد اظمك وسط عيني
فرگاك بگليبي جرح ... ينزف محنّه
والشوگ لمن ينذبح ... ينزف محنّه
بعيوني انته أهلال ... عفت أمك بياحال
يبني يغالي
........
وليدي هالهوه بريتي وأشمه
الدنيه بخير يمي وآنه يمه
أخافن ينحسد وبروحي اظمه
عزيز اعله العزيز اتخاف امه
ألله يفراگ الظنه ... يصعب عليه
كل يوم اليمر بسنه ... يصعب عليه
يانبظة الدلال ... عفت أمك بيا حال
يبني يغالي
.........
يسهر اللي سهرته وتعب الايام
چنت افرش دليلي بوسطه وتنام
ما أدري الزمان لأمك شظام
بيك ابقه مسعده الأمل مادام
أنحرم منك ياسبب ... ونته حياتي
محزونه واعتب هالعتب .... ونته حياتي
حزني حزن چتال ... عفت أمك بيا حال
يبني يغالي
.....
يالخّله بدليل فگدك صواب
لايشفه بعد لساعه ماطاب
سولفلي شنو الشفته بالغياب
هم تشتاگ يوليدي لللأحباب
مشتاگه أحبابك الك ... ناشدواعنك
ماترد يوليدي الهلك ... ناشدوا عنك
ماچانت أعله البال ... عفت أمك بيا حال
يبني يغالي
.....
تظل الشوفتك مشتاگه العيون
لاتگطع لأمك يبني اللظنون
تعال أحبيب احبابك ينشدون
هم يرجع الداره أبنچ يگولون
شوفتك ترويني نبع ... يالغبت عني
بت ألبگلبي ينگطع ... يالغبت عني
لاتشمت العذال ... عفت أمك بيا حال
يبني يغالي
.......
جمال البيك يبني ايشتت الراي
اعاين صورتك واتحسر أهواي
أقبّل هاي وارجع احظن الهاي
يبني وحگ عيني تمرد اچلاي
يبني بجمالك ماشفت ... ياحلوا الاوصاف
طولك اعاين كل وكت .... ياحلوا الاوصاف
هم العليه أجبال ... عفت أمك بيا حال
يبني يغالي
....
سيد عدنان الحمامي




الساعة الآن 08:00 AM

Powered by vBulletin™ Version 3.8.7
Copyright © 2024 vBulletin Solutions, Inc. All rights reserved.
Support : Bwabanoor.Com
HêĽм √ 3.1 BY:
! ωαнαм ! © 2010

Security team