:: منتديات السيد عدنان الحمامي ::

:: منتديات السيد عدنان الحمامي :: (http://www.adnanalhamame.com/vb/index.php)
-   قصائد الاربعينية (http://www.adnanalhamame.com/vb/forumdisplay.php?f=68)
-   -   -للاربعين --- فراگ الاخو ماينحمل (http://www.adnanalhamame.com/vb/showthread.php?t=11856)

سيد عدنان الحمامي 10-06-2019 04:25 AM

-للاربعين --- فراگ الاخو ماينحمل
 

للاربعين
....
المستهل
....
فراگ الاخو ماينحمل
عالاخت ولله مو سهل
يعباس ... يعباس
......
خويه جيتك بربعينك شايله بگلبي جرح
انته مذبوح ومشينه وآنه كلسا أنذبح
ليل ماغمظت جفوني اليل بعيوني ملح
مساهره وبس بيك أحسب خويه والحد الصبح
من السهر لا ما أمل ... عالاخت ولله موسهل
يعباس .. يعباس
....
شيلتي كلسا أشمها بيها لچفوفك عطر
حلوه وشكثر المواقف أبچي لمن تنذكر
أمدل له منك شاطلب مني لا ماتعتذر
أمن الهوه لو مر عليه اتخاف من عنده حذر
وشحالني يابو الفضل ... عالاخت ولله موسهل
يعباس ... يعباس
........
بهيبتك مهيوبه أختك كلها هابت هيبتي
چنت أعاين وجه أبويه من تجيني الخيمتي
تشوفني شمحتاجه تسئل وآنه تنسر مهجتي
وآنه اگلك خويه سالم تظل هاذي طلبتي
ماترضه لدموعي تهل ... عالاخت ولله موسهل
يعباس ... يعباس
......
خويه بوجودك أميره ولاهظم مره شفت
بروحتك چم رجفه گلبي أعليك من خوفي أرجفت
للشريعه خذت عمري وياك وبجودك رحت
طاحن أخيامي عليه عالنهر لمن طحت
ونگطعت أحبال الوصل ... عالاخت ولله موسهل
يعباس ... يعباس
.........
يامن بگلبي مكانه روحي وعيوني ملك
أربعين انهار مرن وآنه مشتاگه ألك
شلون بختك يبو فاضل دوره من دار الفلك
للشماته الحادي يحدي دربه بضعوني سلك
للشام رحنه عالهزل ... عالاخت ولله مو سهل
يعباس ... يعباس
.........
أگعد ارد أحچي وسولف يالذي لختك حبيب
خويه لاتغتاظ اخبرك راسي ورموشي تشيب
يالذي من چنت أشوفك علّه لو بيّه تطيب
هالغريبه گالوا أختك صدگ وآنه أخت الغريب
والگلب بغيابك وجل ... عالاخت ولله مو سهل
يعباس ... يعباس
..........
أنتم اهلي البخت بيكم وآنه رديت الهلي
وينه التباريني عينه ولايفارگ محملي
أبد ماعن سمعي غابت من يگلي أتدللي
وهسا رديت بيتامه مالهم خويه ولي
لعباس نتمنه عدل ... عالاخت ولله موسهل
يعباس .. يعباس
....
سيد عدنان الحمامي


الساعة الآن 02:58 PM

Powered by vBulletin™ Version 3.8.7
Copyright © 2024 vBulletin Solutions, Inc. All rights reserved.
Support : Bwabanoor.Com
HêĽм √ 3.1 BY:
! ωαнαм ! © 2010

Security team