للعليله -- وداعة الله .. راح اظل مشتاگه
 

للعليله
...
المستهل
....
وداعة الله ... راح أظل مشتاگه
وداعة الله .... بعد مانتلاگه
صعبه أودعك بويه يحسين بدمع
علّه وفراگ وبعد قيس الوضع
وداعة الله
.......
بويه ألله أوياك بويه .. ودعتني .. يالعفتني .. صبر مابّيه
طفله محتاجه الحنانك .. أظل بضنوني .. وشابحه عيوني .. الدربك أربيه
أوياك اريدن .. بالضعن وياكم
أوياك أريدن .. مگدر أبلياكم
أدري لورحتوا ألشمل ماينجمع
علّه وفراگ وبعد قيس الوضع
وداعة الله
......
وين منواك بمسيرك .. خذت روحي .. كثر نوحي .. الستر ياربي
عيني بس لا ماتشوفك .. وماتجيني .. ونته عيني .. ياضوه الدربي
خالي دارك .. ما أحبه بدونك
خالي دارك ... يالعشت بعيونك
هم اظل بحزني مطويه الضلع
علّه وفراگ وبعد قيس الوضع
وداعة الله
.....
كل خواتي أوياك يرحن .. كل أخوتي .. وأجه موتي .. لا أحد يمي
خل يظل عبد الله بويه .. وياي خليه .. من اناغيه .. يخفف الهمي
لرض العراگ .. لومشوا احبابي
لرض العراگ ... ماترد غيابي
چم عزيز الراح بيهم أنفجع
علّه وفراگ وبعد قيس الوضع
وداعة الله
....
صفرة الموت أعله وجهي .. وألم ميخف .. أيدي ترجف .. العافيه بيكم
طارش تودون اليّه .. طمنوني .. موعيوني .. تنتظر ليكم
كون أموتن .. قاسيه دنياكم
كون أموتن.. لاعشت فرگاكم
ليش ماخذ بويه حتى اليرتضع
علّه وفراگ وبعد قيس الوضع
وداعة الله
.....
بويه اتنفس وجودك .. هوه الريتي .. ضوه البيتي .. من تطب داري
أبلا أبو كل بيت مظلم .. والهظيمه ,, لليتيمه ... وبالگلب ناري
ها يروحي ... باقيه ألمن بعد
ها يروحي ... مفارگ ايصير الوعد
بداري چن صوت المنايه ينسمع
علّه وفراگ وبعد قيس الوضع
وداعة الله
....
راحوا أحبابي ونسوني .. بداري ظليت .. بوحشة البيت .. بحسره وألامي
بعد ماظن بالسلامه .. أتشوف العيون .. من يعودون .. هالجفن دامي
هذا مكتوب .. بعلّتي ومصابي
هذا مكتوب .. بالدليل أصوابي
ولله فگد ألابو لا ماينجرع
علّه وفراگ وبعد قيس الوضع
وداعة الله
.....
سيد عدنان الحمامي